<<

Eu ben vin estar ó moucho

Este é un pequeno xogo válido a partires dos 3 anos para calquera número de participantes. A versión básica, orientada á aula, é tal que así:

  1. A coordinadora deixa claro quen ten medo ou non. Por exemplo: os que leven unha prenda vermella (non) teñen medo.
  2. Todos cantan “Eu ben vin estar ó moucho / enriba d’ aquel penedo”.
  3. Os que non teñan medo segundo a primeira condición fan un xesto de negación mentres cantan “¡Non che teño medo moucho, moucho non che teño medo!”
  4. A coordinadora avisa ós participantes que cantaron cando non deberían ou non cantaron cando deberían.

Algunhas variantes poden pasar por:

  1. Trocar a persoa coordinadora tras cada rolda.
  2. Eliminar do xogo os participantes que se trabuquen.
  3. Asegurarse de que todos saben se van ter medo ou non antes de cantar.

E velaquí unhas poucas opcións de exemplo para o paso de decidir quen ten ou non ten medo:

  1. Os que teñan exactamente/máis/menos (de) X anos.
  2. Os que sexan zurdos.
  3. Os que non tiveron medo na rolda anterior.
  4. Os que teñan un nome que conteña/comece/remate (por) X.
  5. Os que teñan irmá(n)s.
  6. Os que teñan ollos firmes e verdadeiros.
  7. Os que pensen que 5 + 4 son 9.
  8. Os que tomaron froita hoxe.
  9. A conxunción/disxunción/negación doutras opcións anteriores (“os que sexan zurdos e/ou teñan irmás”).