Culture & Conquest

Pódese aprender algo de todos o xogos: bos, malos ou regulares. Non queda moi claro que podo facer eu con toda esa aprendizaxe, pero iso non me vai parar. Hoxe toca outro xogo de Warp Spawn Games, os mesmos do Malta Convoy e desa versión de cartas do Golden Axe que non funcionaba moi ben. Todos teñen o seu mérito, pero de calidade lúdica andan xustos, será este Culture & Conquest a verdadeira xoia oculta que agocha esa páxina web do século pasado? Seguramente non, pero eu vouno probar.

Inda que pensado para un número arbitrario de xogadores, tamén inclúe unha versión en solitario, na que desaparece toda a diplomacia (ben) e os trocos (ben) e substitúe a parte militar cun sistema que non escala (mal) nin é divertido (mal). A idea é xogar 50 quendas e sumar os puntos, algo que xa non soa moi excitante porque nin ten unha vara de medir as puntuacións en solitario, pero xa adianto que non cheguei nin á segunda.

Na parte inicial tocoume xogar cos romanos (mal), que obteñen gratis a tecnoloxía de lei para mitigares a anarquía (mal). A primeira quenda resultou tal que así:

1. Fase de poboación: 1d6-2 = 3 agricultores novos para sumar 13 de poboación total.
2. Fase de recursos: saíu o 30% que resulta en ningún efecto.
3. Fase de distribución: lendo un pouco máis adiante, meto 5 na agricultura, 2 traballadores, 2 mercadores e 4 estudosos.
4. Fase de líder: gaño un a lotaría do 33% para obter un xeneral de guerra.
5. Fase de colleita: 15 de comida polos agricultores, abondo.
6. Fase de desastres: só saen 1 de cada 6 veces, non me tocou.
7. Fase de mantemento: todos comen e o xeneral de antes morre de vello sen que tivese opción de aproveitalo.
8. Fase de guerra: non estou en disposición de facer nada diso.
9. Fase de trocos: non funciona en solitario.
10. Fase de construír: +2 puntos de traballo polos traballadores, preciso 20 para facer algo.
11. Fase de investigación: cada escolar tira 1d12 e obtén unha tecnoloxía ao nun 1. Tiven a sorte de sacar ese valor e, logo de tirar noutra táboa, poder escoller libremente o avance. Escollín escritura, que me dará outro dado de 12 para tentar atopar máis tecnoloxías.
12. Fase de ingresos: 2 ouros polos mercadores + 1 pola cidade inicial. Non chega a nada.

Tería que facer unha análise das opcións de puntuación para saber por onde continuar. A miña primeira intuición dicía que é mellor obviar totalmente a guerra, obter o maior número de tecnoloxías posibles, quizais vivir sen defensas e asumir os eventos de saqueo e ir conseguindo puntos aquí e alá construíndo cidades e marabillas; ao contrario que nos Civilization, non hai nada que faga subir os números moi rápido, polo que serían outras 49 quendas de lento ascenso, ata que os dados decidan que perdo todo nun volcán. A outra opción sería tirar pola guerra, que outorga puntos de vitoria tras cada conquista, pero só é posible activar esa fase tras unha tirada de 33%, polo que resulta tamén unha lotaría.

Que máis dá! Isto non funciona en solitario e non ten pinta de que vaia aprender moito de nada. Supoño que en multixogador, con xente que lle guste o tema da diplomacia, podería ter o seu sentido, pero semella que duraría moitísimo tempo con máis posibilidades de frustración ca de diversión.